ചത്തതു കീചകനെങ്കില്‍ കൊന്നതു ഭീമന്‍ തന്നെ

ചത്തതു കീചകനെങ്കില്‍ കൊന്നതു ഭീമന്‍ തന്നെ

ഒരു സംഭവത്തിന്‍റെ പ്രത്യേകത നോക്കി ആ സംഭവത്തിനു പിന്നില്‍ പ്രവര്‍ത്തിച്ചവരെക്കുറിച്ച് ഊഹിച്ചു മനസ്സിലാക്കുന്നതിനാണ് ‘ചത്തതു കീചകനെങ്കില്‍ കൊന്നതു ഭീമന്‍ തന്നെ’ എന്ന ശൈലി പ്രയോഗിച്ചുവരുന്നത്.

പഞ്ചപാണ്ഡവന്മാര്‍ ചൂതുകളിയില്‍ തോറ്റു പന്ത്രണ്ടു വര്‍ഷം വനവാസവും കഴിഞ്ഞ് ഒരു വര്‍ഷത്തെ അജ്ഞാതവാസത്തിനായി വിരാട രാജധാനിയില്‍ എത്തി. എല്ലാവരും വേഷം മാറിയാണ് അവിടെ ഒളിച്ചു താമസിക്കുന്നത്. പാണ്ഡവന്മാര്‍ തങ്ങളുടെ ദിവ്യായുധങ്ങള്‍ കാട്ടിലെ ഒരു വന്‍മരത്തിന്‍റെ പൊത്തിലൊളിപ്പിച്ചുവച്ചു. ചൂതുകളിയില്‍ മിടുക്കനായ യുധിഷ്ഠിരന്‍ കങ്കന്‍ എന്ന പേരോടെ ബ്രാഹ്മണവേഷത്തിലും മല്ലയുദ്ധത്തില്‍ മിടുക്കനാണെന്നു പറഞ്ഞ് അരിവയ്പുകാരനായി വല്ലവന്‍ എന്ന കള്ളപ്പേരില്‍ ഭീമനും വിരാട രാജാവിന്‍റെയടുത്ത് അഭയം തേടി.

പെണ്ണുങ്ങള്‍ക്കു നൃത്തവും സംഗീതവും അഭ്യസിപ്പിക്കുന്ന ഒരു നപുംസകമായി ബൃഹന്നള എന്ന പേരില്‍ അര്‍ജുനനും വന്നു. കുതിരക്കാരന്‍ എന്ന മട്ടില്‍ ഗന്ഥികന്‍ എന്ന പേരു സ്വീകരിച്ചു നകുലനും, പശുക്കളെ നോക്കാനായി തന്ത്രിപാലന്‍ എന്ന പേരില്‍ സഹദേവനും രാജധാനിയില്‍ കയറിപ്പറ്റി. സുന്ദരിയായ ദ്രൗപദി സ്ത്രീകളെ അണിയിച്ചൊരുക്കുന്ന സൈരന്ധ്രി എന്ന നിലയില്‍ മാലിനി എന്നു പേരും മാറ്റി രാജകൊട്ടാരത്തില്‍ താമസം തുടങ്ങി.

പഞ്ചപാണ്ഡവന്മാര്‍ ദ്രൗപദിയെ പൊന്നുപോലെ നോക്കാനും ശ്രദ്ധിച്ചിരുന്നു. അങ്ങനെയിരിക്കെ വിരാട രാജാവിന്‍റെ ഭാര്യാസഹോദരനായ കീചകനു ദ്രൗപദിയോട് ഇഷ്ടം തോന്നി. തനിക്കു ഭര്‍ത്താക്കന്മാരായി അഞ്ചു ഗന്ധര്‍വന്മാരാണുള്ളതെന്നും അവരറിഞ്ഞാല്‍ കീചകന്‍റെ കഥകഴിക്കുമെന്നും സൈരന്ധ്രി ഓര്‍മ്മപ്പെടുത്തി.

ഒടുവില്‍ തന്‍റെ സഹോദരിയായ മഹാറാണിയുമായി കീചകന്‍ ഗൂഢാലോചന നടത്തി. അടുത്ത വാവുദിവസം രാത്രിയില്‍ മദ്യവും ഭക്ഷണസാധനങ്ങളും വാങ്ങിക്കൊണ്ടുവരാന്‍ സൈരന്ധ്രിയെ കീചകന്‍ താമസിക്കുന്ന വസതിയിലേക്കു മഹാറാണി പറഞ്ഞുവിട്ടു. സൈരന്ധ്രിയെ കീചകന്‍ കയറിപ്പിടിച്ചു. കുതറിയോടിയ സൈരന്ധ്രിയുടെ പിന്നാലെ എത്തിയ കീചകന്‍ രാജസദസില്‍വച്ച് അവളുടെ തലമുടിയില്‍ കുത്തിപ്പിടിച്ചു. ഇതു കണ്ട് ഒന്നും ചെയ്‌യാനാകാതെ അമര്‍ഷം കടിച്ചമര്‍ത്തി യുധിഷ്ഠിരനും ഭീമനും മാറിനിന്നു. തങ്ങളെ തിരിച്ചറിയാതിരിക്കാനാണ് അവര്‍ക്ക് അങ്ങനെ പെരുമാറേണ്ടിവന്നത്. കീചകനെ സൂര്യഭഗവാന്‍ അയച്ച ഒരു രാക്ഷസന്‍ അടിച്ചു ദൂരെത്തെറിപ്പിച്ചു.

കീചകനെ വകവരുത്തണമെന്നു ഭീമനും ദ്രൗപദിയും കൂടി തീരുമാനിച്ചു. അതനുസരിച്ച് സൈരന്ധ്രി കീചകനെ കണ്ട് രാത്രി നൃത്തശാലയില്‍ ഒറ്റയ്ക്കു കാത്തിരിക്കുമെന്ന് അറിയിച്ചു. കീചകന്‍ കൃത്യസമയത്തുതന്നെ നൃത്തശാലയില്‍ എത്തിച്ചേര്‍ന്നു. നൃത്തവേദിയില്‍ ഇരുളിന്‍റെ മറവില്‍ രണ്ടു കരുത്തന്മാര്‍ തമ്മില്‍ ഘോരമായ സംഘട്ടനം നടന്നു. അവസാനം ആ ദ്വന്ദയുദ്ധത്തില്‍ കീചകന്‍റെ അന്ത്യം സംഭവിച്ചു.

കീചകവധത്തിന്‍റെ വാര്‍ത്ത നാട്ടിലാകെ പരന്നു. കരുത്തനായ കീചകനെ വധിക്കാന്‍പോന്ന ആളാരായിരിക്കുമെന്നു വാര്‍ത്ത കേട്ടവരെല്ലാം പരസ്പരം ചോദിച്ചു. കൗരവന്മാരും വാര്‍ത്തയറിഞ്ഞ് അത്ഭുതപ്പെട്ടു. അപ്പോഴും ഹസ്തിനപുരത്തുള്ള പഴമക്കാര്‍ പറഞ്ഞത് ഇങ്ങനെയാണ്: “ചത്തതു കീചകനെങ്കില്‍ കൊന്നതു ഭീമന്‍ തന്നെ“.

കടപ്പാട്: ഉള്ളടക്കം – യാഹൂ, ചിത്രം – വിക്കിമീഡിയ

ശ്രീ · കൗതുകം · 06-06-2014 · സോഫ്റ്റ്‌വെയര്‍ പ്രോജക്റ്റ് മാനേജര്‍, ടെക്നോളജി കണ്‍സള്‍ട്ടന്റ്, ബിസിനസ്‌ പ്രോസസ് കണ്‍സള്‍ട്ടന്റ്, ബ്ലോഗര്‍, ശ്രേയസ് ഫൌണ്ടേഷന്റെ മാനേജിംഗ് ട്രസ്റ്റി എന്നിങ്ങനെ പ്രവര്‍ത്തിക്കുന്നു. F T G+ W

Leave a Reply

Your email address will not be published. Required fields are marked *

four × 3 =